حوار مع المتميزين من محافظة البحيرة

حوار اجراه طارق رشيد / البحيرة

 

•منة.. كلمينا عن نفسك الأول و هواياتك..
⁃ أنا منة فتحي فيالة من كفر الدوار البحيرة، من بنات مدرسة عمر بن الخطاب الرسمية لغات، بالنسبة لهوايتي فأنا بحب القراءة جدًا و دة وصلني لموهبة الكتابة

•إيه كان حلمك من أول السنة يعني كنتِ بتفكري دايمًا في كلية معينة ولا عندك أكتر من خيار؟
– ما كانش عندي حاجة معينة الحقيقة، ميولي كانت بتختلف من حاجة لحاجة فكان قدامي أكتر من خيار
•طبعًا كلنا عارفين إن المذاكرة الصح عايزة تنظيم وقت صح.. إزاي كنتِ بتنظمي وقتك؟

-.. كنت بهتم أذاكر الحاجة يوم ما باخدها، طبعًا ما كنتش بعرف أخلص دايمًا كل حاجة بس دة كان بيوفر علي كتير و مش بيحسسني بالضغط
•السؤال اللي بيحير طلبة كتير.. أنام قد إيه في ثانوية عامة.. إيه نصيحتك في الموضوع ده؟

-.. ٨ ساعات كاملين، النوم القليل بيخلي التركيز قليل، و النوم الكتير بيؤدي للكسل، فلازم الطالب ياخد ٨ساعات خاصة بين عشرة بالليل لستة الصبح
•هل كنتِ واخدة كله جد ولا كان في ترفيه و بتخرجي من موود المذاكرة إزاي؟

-.. لا طبعًا كنت بخرج من مود المذاكرة و أُرفِّه عن نفسي، في جملة لـ علي بن أبي طالب بتقول: إن النفوس تمل كما تمل الأبدان، فاهدوا إليها طرائف الحكم،، ما ينفعش نفضل ف جو المذاكرة لوقت طويل دة بيعود بالعكس علينا و عمره ما بيفيد، فكنت بستغل أي فرصة أخرج فيها من الجو دة سواء أعمل حاجة بحبها أو أتمشى مثلا مع صاحبتي
•أكتر مادة كنتِ مستتقلاها و حساها صعبة، و اتعاملتِ معاها إزاي؟

-.. ما كنتش مستتقلاها بالمعنى الحرفي، ممكن نقول كنت مدياها وضعها بالاهتمام، و دي طبعًا الفيزياء، و اتعاملت معاها زي ما مدرسي نصحني إني حليت كتير جدًا و اتدربت على طريقة الأسئلة و أنواعها
•قُصاد أكتر مادة صعبة أكيد كان في مادة سهلة بالنسبالك و بتحبيها.. كلمينا عنها..

-.. اللغة العربية، هو طبعًا مقدرش أقول سهلة بس أنا من حبي ليها ما كنتش بلاقي فيها صعوبة، كنت بستمتع جدًا بمذاكرتها و بستنى الحصص بتاعتها كإني رايحة أقابل حد عزيز علي
•إيه أجمل حاجة حصلتلك في ثانوية عامة؟

-.. اتعرفت على ناس جديدة، مدرسين و صحاب فزت بيهم و بمعرفتهم و يمكن دي أغلى حاجة طلعت بيها من الثانوية العامة
•كُنتِ متوقعة مجموعك ده؟

-.. كنت متوقعة أكتر منه، أنا كنت واثقة من مجهودي و واثقة إن ربنا هيكرمني، و هو أكرمني فعلا
•تحبي توجهي شكرك لمين، بمعنى مين قدملك مساعدة حتى لو نفسية السنة دي؟

-.. أولا أمي، ساندتني كتير جدًا و وجودها معايا كان مديّني قوة و صبر ما اتخيلتش يبقوا عندي، و بابايا طبعًا، ثم طبعًا مدرسيني الل وجهوني و كانوا دايمًا واثقين فيّ، خاصة مدرس الإنجليش كان مرة قالي “لو أنتِ مش واثقة ف نفسك فأنا واثق فيكِ أكتر من أي حاجة تانية” و ثقته دي فرقت معايا كتير، و أخواتي كانوا موفرينلي البيئة المناسبة للمذاكرة

•نصيحة وجّهيها للطلبة اللي داخلين ثانوية عامة..

-.. أهم حاجة ما تضغطوش على نفسكم، استقبلوا السنة كأنها سنة عادية و تعاملوا معاها من غير ضغط، اعملوا المطلوب منكم و لو في فرصة تطلعوا فيها من جو المذاكرة استغلوها، و استمتعوا بيها لإنكوا هتلاقوها مليانة ذكريات حلوة، و المجموع الل يجيلك ارض بيه مهمًا كان، و خليك دايمًا فخور بمجهودك و واثق إن ربنا كاتبلك الخير
•تفتكري المدرسة و المعلمين ليهم دور في التفوق ؟

-.. أيوة طبعًا، أهم دور بعد البيت هو دور المدرسة، تأثير المعلمين ف الطلاب و تشجيعهم ليهم أهم حاجة ممكن تؤدي للإصرار و النجاح، و على حسب دعمهم أو تثبيطهم بتتكون شخصية الطالب، و الحمد لله ربنا أنعم علي بمعلّمين كانوا دايمًا بيشجعوني و واثقين فيّ

 

عن هاني سلام

شاهد أيضاً

“وزير التعليم” يستقبل الأمين العام للمدرسة الرقمية لاستكمال مبادرة المدرسة الرقمية فى مصر

“وزير التعليم” يستقبل الأمين العام للمدرسة الرقمية لاستكمال مبادرة المدرسة الرقمية فى مصر متابعة شيرين …

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

هذا الموقع يستخدم Akismet للحدّ من التعليقات المزعجة والغير مرغوبة. تعرّف على كيفية معالجة بيانات تعليقك.