خطوات التربيه الجنسيه السليمه

كتب أ/رشا طه أحمد
أخصائي تعديل السلوك الأطفال والمراهقين
فى حاجة اسمها التربية الجنسية للاطفال .. دي قواعد عامة لو الام اتبعتها بتفرق جدا مع الطفل لازم تأهلوا اولادكم ازي يتعاملوا مع العالم الخارجي ..
وده نقاط ممكن نختصر فيها التربيه الجنسيه..
١- الطفل من وهو بيبي الام بس اللي تغيرله …
٢- التغير في باب مقفول حتي لو مافيش حد ..
٣- ممنوع تغير قدام حد او مكان مفتوح ..
٤- لو الام مش موجودة الجدة اللي تغير اكبر حد سن فلااصغر والاصغر .. وبردك مكان مقفول ..
٥- من سن سنة ونص الطفل يبداء يشطف نفسة الام تعلمة يشطف نفسة وينظف منطقة العورة ازي ..وتقلل وضع يديها علي منطقة العورة في تنظيف الطفل ..
٦- مرحلة البوتي ترينج لازم باب التوالت يبقي مقفول او مردود عليهم مش تحط البوتي في الرسبشن والاوض غلط جداا
٧- تبداء تقول عيب لما يجي الطفل يرفع هدومة او يغير او يستحمي ولازم يتعود يرد الباب عليه …
٨- ممنوع التقبيل من الفم منعا باتا  الام والاب من الخد فقط او وباقي الافراد من اليد او الجبهه فقط ..
٩- مافيش حاجة اسمها طفل يقعد علي رجل حد ..ولو لازم يقعد يبقي يقعد بالجنب ظهرة للهواء مينفعش يقعد ظهرة في وش اللي قاعد غلي رجله ..
١٠- اول ما الطفل يبداء يتكلم ويدرك هنعيد عليه يوميا من السرة للركبة دي منطقة خاصة بيك انت بس مينفعش حد يشوفها ولا حتي ماما وبابا ..الدكتور بس اللي يشوفها لو انت عيان وماما وبابا يكونوا معاك ..ومينفعش خالص نشوفها عند حد نغمض عنينا عيب نشوف اي حد من السرة للركبة …
١١- نربي عند الطفل ان لو حد بيرفع هدومة او عاوز يلمس المنطقة دي  يقوله لاء عيب بصوت عالي جدا ..ولو مسمعش الكلام نصرخ ونقول عيب لاء لاااااء ونزعق جدا .ونقول بسرعة لاي حد كبير موجود ماما بابا المدرسة الدادا ..
١٣- لو الطفل في حضانة ناني وحدة بس المسؤلة عن دخوله التوالت او تغيرله مش كل يوم ناني شكل ..
١٤- يتنبه علي الحضانة او المدرسة تأكد عليه من السرة للركبة منطقة خاصة بيا مينفعش حد يشوفها او يلمسها مينفعش حد من اصحابي يدخل معايا التوالت مينفعش الاطفال يعملوا قدام بعض او يلبسوا قدام بعض حتي لو نفس النوع …
١٥- ممنوع منعا باتا الاخوات يستحموا مع بعض من غير مايوه حتي لو نفس النوع
١٦-مينفعش اسبهم في البانيو من غير مايوه لو الاب والام هيفضلوا داخلين خارجين علي الطفل ..
١٧- مافيش حاجة اسمها اجبر ابني او بنتي يبوس فلان عشان ضيف  اواغصبة ان حد يبوسة قدامي .. السلام اساسا بالايد مافيش حاجة اسمها بوس وبالعافية …
١٨- طبعا التفريق في المضاجع لازم يبقي للطفل سرير من وهو صغير مينمش مع الاب والام… وطبعا  مينفعش اخوات يناموا جنب بعض ..ايان كان عمرهم حتي لو نفس النوع ..ولو كان ضيق الحال ولازم يناموا علي نفس السرير يبقي لكل واحد الغطا الخاص به …
١٩- اهم نقطة اللي هي الاساس   اي ام واب بيجبروا اولادهم علي الطاعة العمياء.. ويجبرهم علي انهم يسمعوا الكلام من غير مايفهموا الاسباب او يضربوهم ويجبروهم علي سماع الكلام ولو اعترض الطفل واتكلم بيزودوا الضرب او العقاب  ..مع الاسف انتوا كدا  بتسلموا ابنكوا او بنتكوا لاي متحرش بتسلبة كرامته وحريته فبيبقي مباح اي حد يتعدي عليه ومش هيقدر يقاوم ولا حتي يشتكي لانه لو اشتكي هيتعاقب زيادة زي ما عودتوه ..دا غير انه اصلا  فاقد الثقة فيكم وفاقد الامان منكم فمش هيجي يحكلكم اتعمل فيه ايه ..ادو مساحة ليهم عشان يعترضوا ويدافعوا عن حقهم ادوا مساحة ليهم امان يشتكوا وتنصفوهم .
تعود الطفل من الصغر بيربي حياء وبيعرف الطفل حقوقة وانه مش مباح لاي حد غريب او قريب او حتي الاب والام وانه كيان ليه حرية الاعتراض ..
يا رب تكون الرسالة وصلت