المجلة العلمية اهرام مجلة مستقلة تحت إشراف هاني سلام
الونس
ايه مفهومك عن الونس وهل الونس موجود وبتحس بيه في حياتك ؟
اركان الونس اربعه هما علاقتك ب ربنا و علاقتك بنفسك و علاقتك بشغلك و علاقاتك الاجتماعية
الونس هو شعورك بانك مقبول و محبوب و متشاف و متسمع كلك علي بعض بصفاتك الحلوه و صفاتك الوحشه و تشتتك ولخبطك ومشاكلك و انسانيتك و طبعا دينك
علي طبيعتك ومابتحسبهاش بشكل يهلك تفكيرك ومشاعرك
ومش محكوم عليه من الدايره الصغيره القريبه اللي حواليه الأهل أولهم
الدايره القريبه اللي اختارتها بعنايه و ادتهم وقتك وحبك ومشاعرك و فكرك و حياتك ( نفسك وأهلك و أصدقاءك )
بكده انت شخص متونس طول ما بتبني و تدعم أركانه الاربعه بمنتهي الايمان والحب والحكمه
تقدر توصفلي الشخص المتونس صفاته و شعوره ايه ؟
الشخص المتونس ده هو شخص منعم بالحب والمودة والراحة النفسيه و السلام الداخلي و الكثير من التفكير الايجابي لانه شخص متوازن بنسبه كبيره جدا
الونس ده رزق كبير للشخص المتونس و الأشخاص اللي حواليه
تقدر توصفلي طبيعه ناس موجود وسطهم شخص متونس بيهم ؟
الأشخاص اللي موجود في علاقتها شخص متونس بيهم هم
اشخاص أكثر ايجابيه و تفاعل و حب و موده و كرم وترابط قوي عارفين هما مين محتاجين من بعض ايه ومقدرين بعض علي الحلوه والمره
ناس عندها نفس الهدف في تعزيز شعورهم المتبادل بالحب والرحمه و الاحتواء و الدعم والقبول الغير مشروط
ممكن تقولي الونس ده محتاج منك ايه عشان تحس بيه في حياتك ؟
الونس محتاج منك انك
تقوي أركانه الاربعه طول حياتك بحب و ايمان و عقلانية
وعن طريق ثقافتك الدينيه و ثقافتك في العلوم الإنسانية الحديثه
ايه الأسباب اللي هتبعدك عن الونس ؟
بعدك عن ربنا وده مصدر كل الونس والأمان والقوه
علاقتك الغير سويه بنفسك وعدم تقدير قيمتك الذاتيه
علاقتك الغير سويه باهلك لان الانسان دعمه و جيشه الاول هما أهله و ثاثيرهم علي شخصيته عظيم
علاقاتك الاجتماعيه الغير سويه وتأثيرها الخطير علي حياتك وجودتها
بسمه سامي فاروق
