المجلة العلمية اهرام مجلة مستقلة تحت إشراف هاني سلام
اتكلمنا في المقال اللي فات عن هروب الطفل من مسؤولياته بسبب التربيه المدلله اللي بيتربي عليها من الأشخاص المحيطين ليه في حياته
و عواقب السلوك ده في التربيه وتشكيل شخصيه الطفل
انهارده هنكمل ونشوف النوع التاني من الأطفال اللي بتتهرب من مسؤولياتها مهما كانت بسيطه وايه الأسباب
السبب التاني
هو تربيه الطفل باستخدام أساليب الخوف و الترهيب
اسلوب الخوف والترهيب بيتسبب في فقدان الطفل لتوازنه واستقراره النفسي بيكون شخص مهزوز منعدم الشخصيه مش قادر ياخد اي قرار مهما كان بسيط عايش دايما في حاله قلق وترقب بيدي الأمور اكبر من حجمها الطبيعي ع مدار حياته مما يتسبب له في الكثير من العقابات و الخذلان و المشاكل النفسيه ف بيفشل في تكوين علاقه سويه مع ذاته ومع اهله و أصدقاؤه و زمايله في العمل و المجتمع كله بيسترجع دايما مشاهد الخوف والقلق اللي مر بيهم في حياته في كل ازمه بيمر بيها ف يفشل اكتر واكتر في كل اهدافه و قراراته و نوعيه الأشخاص اللي حواليه
بيتوه في الحياه ويبعد عن ذاته السويه مابيقدرش يتعرف عليها بسبب التشويش الناتج من الخوف والقلق المستمر جواه
التربيه باستخدام سلوك الخوف والقلق والترهيب بتشوه الطفل نفسيا وبتشوه ملامحه و فطرته المخلوق عليهم
و بالتالي مابيكنش قد المسؤوليات المطلوبه منه ف كل مراحل حياته ف بيصبح طفل غير مسؤول و مراهق منعزل ومنطوي أو اجتماعي غير سوي بيتسبب في الكثير من المشاكل ليه و لأهله و شاب فاشل في عمله و زوج فاشل في علاقته مع شريكه واب فاشل في علاقته مع أولاده
و انسان بيعاني من الكثير من الاضطرابات النفسيه التي تتطور لأمراض عقليه مع الوقت في حاله عدم الإنتباه للاهميه علاجها
مسؤوليتك ك ولي الأمر مهمه للغايه ف انت من تحدد مصير ومستقبل اولادك بدرجه وعيك لتربيتك ليهم
بسمه سامي فاروق
