مقالات مشابهة
كتبت : د رضوي العريني
قبل بدايه دروس الثانويه ماتبدأ يا ريت نفهم النقط ديه
١-النظام الجديد في ثانوى مش معتمد على كتب خارجية او حفظ
٢-الطالب هو الاساس يعنى لازم يكون فاهم كويس و عارف يربط المعلومات ببعض
٣-الدروس لو ناويين تدو دروس ما تنفعش بالنظام القديم و العدد المهول دا لازم عدد يسمح بالمناقشة ما بين الطالب و المدرس
٤-ما فيش حاجة اسمها ملزمة مراجعة بتلم كل حاجة شكرا النظام ده خلص خلاص
٥-نحل اول باول من موقع الوزارة و نكون عارفين ان الاسئلة ديه للتدريب و تشغيل الدماغ مش حتيجي بالنص و لا نفس الفكرة في الامتحان بس نشغل دماغنا و نتعود
٦-نظام اننا ناخد الدرس اون لاين و نقعد نسمع بس ده يبقا اسمه هزار يعنى اليوتيوب احسن منه و ببلاش كمان
٧-ما تبداش دروس قبل الدراسة بكتير و الكلام لتالتة ثانوى انت كده بتعيد اخطاء السنين اللى فاتت و مش حتستفيد حاجة بالتكرار المهم تفهم و لو ما فهمتش و اتعادلك مليون مرة حتفضل زي ماانت
٨-اسمع المعلومة من كل المصادر المتوفرة و اسال و افهم بقدر الامكان
٩-اخيرا و انا عارفه ان فيه ناس حتزعل.. لازم ولى الامر بتاع الطالب يعرف ان النظام ده غير زمان
شفت بعيني ناس ضيعو اولادهم و انضحك عليهم و اصرو يشغلو اولادهم بالنظام القديم و قعدو يصوتو بعد كده
بالتوفيق ان شاء الله و ربنا يوفق كل طلبة تالتة ثانوي السنة ديه
و يجعل السنة القادمة سهلة و موفقة لجميع الطلبة باذن الله
